Նիդերլանդների Մաաստրիխտ քաղաքում հանդիսավորությամբ նշվեց Սուրբ Կարապետ հայկական եկեղեցու օծման 12-րդ տարելիցը։ Փետրվարի 9-ին տոնական միջոցառմանը ներկա էին քաղաքի և հարակից բնակավայրերի հայ համայնքի բազմաթիվ անդամներ։
Հայկական հոգևոր օջախ՝ Մաաստրիխտում
Մաաստրիխտի Սուրբ Կարապետ եկեղեցին Արևմտյան Եվրոպայում գործող հայկական հոգևոր կենտրոններից մեկն է։ Մինչև դրա հիմնադրումը, քաղաքի շուրջ 100-ից ավելի հայ ընտանիքները զգալիորեն կարոտում էին հայկական եկեղեցու ներկայությանը։ Ի վերջո 14 տարի առաջ հայ համայնքի ջանքերով ձեռք բերվեց կրոնական կառույց, որը 2013 թվականին վերածվեց հայկական եկեղեցու և օծվեց որպես Սուրբ Կարապետ։
Մինչ օրս այն շարունակում է ծառայել հայ համայնքին՝ պահպանելով եկեղեցական ավանդույթները` դառնալով ազգային ինքնության պահպանման կարևոր կենտրոն։
Հանդիսավոր արարողությունը
Օծման 12-ամյակի տոնակատարությունը գլխավորել է Արևմտյան Եվրոպայի Հայրապետական Պատվիրակ, Գերաշնորհ Տեր Խաժակ Արքեպիսկոպոս Պարսամյանը, ով մատուցել է Սուրբ և Անմահ Պատարագ։ Հավատացյալները միասին աղոթել են, որից հետո մասնակցել մատաղօրհնության արարողությանը։
Սրբազանը իր քարոզում կարևորել է հայ համայնքի միասնականությունը, ազգային ինքնության պահպանումն ու Հայ Առաքելական Եկեղեցու ավանդույթներին հավատարիմ մնալու անհրաժեշտությունը։
Մշակութային ծրագիր՝ համայնքի համախմբման ուղի
Տոնական միջոցառումը շարունակվել է մշակութային ծրագրով, որը կազմակերպվել էր Մաաստրիխտի «Անի» հայ համայնքի ղեկավար և եկեղեցու ծխական խորհրդի ատենապետ Լևոն Սարգիսի նախաձեռնությամբ։ Միջոցառմանը ելույթ են ունեցել քանոնահարուհի Նարե Խորենին, սոպրանո Միլենա Բեգլարյանը, սոպրանո Տաթևիկ Աշուրյանը, ինչպես նաև քաղաքի կիրակնօրյա հայկական դպրոցի սաները։
1998 թվականին հիմնադրված Մաաստրիխտի «Անի» համայնքը, չնայած իր հայապահպան առաքելությանը, ինչպես սփյուռքի շատ համայնքներ, կանգնած է համախմբվածության և ազգային ինքնության պահպանման բնական դժվարությունների առջև։ Այդ ուղղությամբ ջանքեր են գործադրում թե՛ Հայ Առաքելական Եկեղեցու սպասավորները, թե՛ համայնքային կյանքը կազմակերպողները։
Հայ համայնքի ապագա հեռանկարները
Լիմբուրխ նահանգի միակ հայկական եկեղեցին շարունակում է իր առաքելությունը՝ ծառայելով տեղի հայ համայնքին։ Մաաստրիխտի հայերը մշտապես ձգտում են ամրապնդել իրենց կապը հայրենիքի հետ և պահել ազգային արժեքները։
Հիշյալ այս միջոցառմանն է անրադարձ կատարել «Արեւելք» պարբերականը, որը առաջիկայում հարցազրույց կտպագրի Մաաստրիխտի հայ համայնքի ղեկավար Լևոն Սարգիսի հետ ։
Միջոցառման մասին հոդված է տպագրել նաև Pontifical Legation of the Western Europe կայքը։
No comments:
Post a Comment