«Նիդերլանդական Օրագրի »5-ամյակի (փաստացի՝ 9) կապակցությամբ շնորհավորական ուղերձներ ունեցանք Նիդերլանդահայ գրեթ բոլոր համայնքներից և բազմաթիվ կառույցներից: «Նիդերլանդական Օրագրին» շնորհավորել են Հաագայի, Մաստրիխտի, Նայմեխենի, Ամստերդամի, ՈՒտրեխտի, Ալմելոյի, Դեն Բոսի, Պյուրմերենդի և այլ քաղաքների հայ համայնքի ղեկավարներն ու անդամները: Արձագանքներ ունեցանք նաև Հայաստանից ու սփյուռքից, որոնց մի մասը ցանկանում ենք ներկայացնել մեր ընթերցողին:
ԱԻԴԱ ՆԵՐՍԻՍՅԱՆ
Հեռուստահաղորդավար, լրագրող-մեկնաբան
(Հայաստան)
Ինտերնետային լրատվական մեծ դաշտում այսօր կայանալը, ճանաչելի դառնալը, վստահություն ձեռք բերելը, առավել ևս առաջատարի դիրքերին հավակնելը, մեղմ ասած, դժվար է: Ծանոթանում ես «Նիդերլանդական օրագիր» տեղեկատվական, գրական-մշակութային, հասարակական-քաղաքական լրատվամիջոցի անցած հարուստ ուղուն, նիդերլանդահայության շրջանում ծավալած գործունեությանը, և ապշում. ինչպե՞ս է հաջողվել ընդամենը մեկ հնգամյակում այդքան ձեռքբերումներ ունենալ՝ տեղեկատվական համակարգում ամենուր սփռելով իր կայք-էջերը, միաժամանակ ձեռքը պահած համայնքի զարկերակի վրա:
Այսօր ՆԻԴԵՐԼԱՆԴԱԿԱՆ ՕՐԱԳՐԻ տարեդարձն է, առաջին հոբելյանական տարեդարձը:
Սրտանց շնորհավորում եմ բոլոր աշխատակիցներին, լրագրողներին, մաղթում հետաքրքիր մտքեր, գաղափարներ, ճշմարիտ հոդվածներ, անաչառ ու անկողմնակալ մոտեցում, երևույթների ճիշտ գնահատում, և, որ ամենակարևորն է, քայլել ժամանակին համընթաց՝ միշտ բարձր պահելով պրոֆեսիոնալիզմի նշաձողը : Ասում են յուրաքանչյուր հոբելյան նոր նախաձեռնությունների, հետաքրքիր մտահղացումների ու ծրագրերի սկիզբ է: Թող այդ սկիզբը բեղմնավոր ընթացք և հաջող ավարտ ունենա:
Իսկ քանի որ առջևում Ամանոր է և Սուրբ Ծնունդ, շնորհավորում եմ նաև այս առիթով: Բոլորիդ քաջառողջություն եմ մաղթում, ստեղծագործական եռանդ՝ ձեր դժվարին ու շնորհակալ գործում:
No comments:
Post a Comment